फ्रान्स- गैरआवासीय नेपाली संघ (एनआरएनए) भित्र राष्ट्रिय समन्वय परिषद् (एनसीसी) तहमा एकता प्रक्रिया औपचारिक रूपमा सुरु भएको छ । नवनिर्वाचित अध्यक्ष डा. हेमराज शर्माले आफ्नो यूरोप भ्रमणका क्रममा फ्रान्सबाट उक्त एकता अभियानको शुभारम्भ गर्नुभएको हो ।
यसअघि काठमाडौँमा ‘फेस–टु–फेस’ बैठक सम्पन्न गरेपछि अध्यक्ष शर्मा यूरोप प्रस्थान गर्नुभएको थियो । सोही क्रममा फ्रान्समा लामो समयदेखि समानान्तर रूपमा सञ्चालन हुँदै आएका दुई समूहबीच संवाद र सहमतिमार्फत एकीकृत कार्यसमिति गठन गरिएको छ ।
भेलाबाट दिलीप गुरुङको नेतृत्वमा एनआरएनए फ्रान्सको नयाँ कार्यसमिति चयन गरिएको छ । एकता प्रक्रियापछि संगठनभित्रको विवाद समाधान हुँदै संस्थागत सुदृढीकरणमा सहयोग पुग्ने विश्वास व्यक्त गरिएको छ ।
अध्यक्ष डा. शर्माले “आईसीसी तहमा एकता सम्पन्न भइसकेपछि एनसीसी तहको एकता आफ्नो प्राथमिकतामा रहेको” बताउनुभयो । उहाँले फ्रान्सबाट सुरु भएको यो अभियान क्रमशः अन्य देशहरूमा पनि विस्तार गरिने उल्लेख गर्दै विश्वभर छरिएका नेपालीहरूलाई एउटै प्लेटफर्ममा ल्याउने प्रयास भइरहेको जानकारी दिनुभयो ।
एनआरएनएभित्र पछिल्लो समय देखिँदै आएको विभाजन अन्त्य गर्दै संगठनलाई एकताबद्ध र प्रभावकारी बनाउने उद्देश्यसहित यो पहल अघि बढाइएको बताइएको छ । नेतृत्व तहले एकताको सन्देशलाई विश्वभर फैलाउँदै आगामी दिनमा थप देशहरूमा पनि यस्तै सहमति जुटाउने तयारी गरेको जनाएको छ ।
समग्रमा, फ्रान्सबाट सुरु भएको एनसीसी एकता प्रक्रिया एनआरएनएको संगठनात्मक एकीकरणतर्फ महत्वपूर्ण कदमका रूपमा हेरिएको छ ।
