सफल व्यवसायी शेष घले र जमुना गुरुङ सन् २०२६ मा पनि अष्ट्रेलियाका सर्वाधिक धनी व्यक्तिहरूको सूचीमा परेका छन् ।
लण्डन – गैरआवासीय नेपाली संघ (एनआरएनए) का पूर्वअध्यक्ष तथा सफल व्यवसायी शेष घले र जमुना गुरुङ सन् २०२६ मा पनि अष्ट्रेलियाका सर्वाधिक धनी व्यक्तिहरूको सूचीमा परेका छन् ।
सन् २००९ मा पहिलोपटक अष्ट्रेलियाका शीर्ष २५० धनीहरूको सूचीमा प्रवेश गरेका घले दम्पतीले त्यसयता निरन्तर १८ वर्षसम्म आफ्नो स्थान सुरक्षित राख्दै आएका छन् । यो उपलब्धिले उनीहरूको व्यवसायिक सफलता र दीर्घकालीन निरन्तरतालाई झल्काउँछ ।
घले दम्पती शिक्षा तथा घरजग्गा क्षेत्रका स्थापित नामका रूपमा परिचित छन् । उनीहरूले स्थापना गरेको मेलबर्न इन्स्टिच्युट अफ टेक्नोलोजीमार्फत अन्तर्राष्ट्रिय विद्यार्थीहरूलाई गुणस्तरीय शिक्षा प्रदान गर्दै आएका छन् भने अष्ट्रेलियाको रियल इस्टेट क्षेत्रमा पनि उल्लेखनीय लगानी गरेका छन् ।
द अष्ट्रेलियनले सार्वजनिक गरेको सन् २०२६ का लागि तयार पारिएको धनी तथा उच्च आम्दानी गर्ने व्यक्तिहरूको सूचीअनुसार शेष घले १५०औँ र जमुना गुरुङ १५१औँ स्थानमा रहेका छन् ।
उनीहरूको संयुक्त सम्पत्ति करिब १ अर्ब २१ करोड अमेरिकी डलर पुगेको जनाइएको छ । यसले उनीहरूलाई अष्ट्रेलियामा रहेका सफल आप्रवासी उद्यमीहरू मध्ये एक प्रमुख उदाहरणका रूपमा स्थापित गरेको छ ।
घले दम्पतीको निरन्तर सफलता र उपलब्धिलाई नेपाली समुदायले गर्वका साथ हेर्ने गरेको छ । उनीहरूको यात्रा नयाँ पुस्ताका उद्यमीहरूका लागि प्रेरणादायी बनेको छ भने अन्तर्राष्ट्रिय स्तरमा नेपालीहरूको पहिचान अझ सुदृढ बनाउन पनि महत्वपूर्ण योगदान पुर्याएको छ ।
