ट्रम्पको अल्टिमेटमपछि दबाबमा इयु
अमेरिकी राष्ट्रपति Donald Trump ले युरोपेली वस्तुमाथि थप कडा भन्सार शुल्क लगाउने चेतावनी दिएपछि European Union र अमेरिकाबीचको व्यापार सम्झौता अन्तिम चरणमा पुगेको छ । लामो समयदेखि अड्किएको उक्त सम्झौतालाई कार्यान्वयनमा लैजान युरोपेली संसद्, सदस्य राष्ट्र र वार्ताकारहरू निर्णायक छलफलमा जुटेका छन् ।
गत जुलाईमा स्कटल्यान्डको टर्नबेरीमा अमेरिकी राष्ट्रपति ट्रम्प र युरोपेली आयोगकी प्रमुख Ursula von der Leyen बीच अधिकांश युरोपेली वस्तुमा १५ प्रतिशत भन्सार शुल्क लगाउने सहमति भएको थियो । तर सम्झौताको अन्तिम कानुनी पाठमा अझै पूर्ण सहमति हुन सकेको छैन ।
ट्रम्प प्रशासनले जुलाई ४ भित्र सम्झौता कार्यान्वयन नभए युरोपेली वस्तुमाथि थप कडा कर लगाइने चेतावनी दिएको छ । विशेषगरी युरोपेली कार र ट्रकमा हालको १५ प्रतिशत शुल्क बढाएर २५ प्रतिशतसम्म पुर्याउन सकिने संकेत अमेरिकाले दिएको छ ।
यसैबीच अमेरिकास्थित इयु मिसनले सामाजिक सञ्जाल एक्समार्फत “सम्झौता भनेको सम्झौता हो” भन्दै दुवै पक्ष सहमति कार्यान्वयनमा प्रतिबद्ध हुनुपर्ने जनाएको छ ।
युरोपेली संसद् र सदस्य राष्ट्रका प्रतिनिधिहरू फ्रान्सको स्ट्रासबर्गमा भेला भएर अन्तिम सहमतिको प्रयासमा जुटेका छन् । उनीहरूको मुख्य उद्देश्य अमेरिका–इयुबीच लामो समयदेखि जारी व्यापार तनाव अन्त्य गर्नु रहेको बताइएको छ ।
अमेरिका र इयुबीच वार्षिक व्यापार सम्बन्ध करिब १६ खर्ब युरो बराबरको रहेको छ । दुवै पक्ष पूर्ण व्यापार द्वन्द्वतर्फ जान नचाहेको विश्लेषण गरिएको छ, किनकि अमेरिका इयुको सबैभन्दा ठूलो व्यापार साझेदार हो ।
तर सम्झौताभित्रका केही प्रावधानलाई लिएर अझै विवाद कायम छ । विशेषगरी अमेरिकाले भविष्यमा सम्झौताको शर्त उल्लंघन गरे इयुले विशेष भन्सार सुविधा हटाउन सक्ने व्यवस्था तथा सम्झौता स्वतः समाप्त हुने समयसीमालाई लिएर संसद्भित्र मतभेद देखिएको छ ।
यद्यपि युरोपेली आयोग र अधिकांश सदस्य राष्ट्रहरूले सम्झौता अन्ततः सफल हुने विश्वास व्यक्त गरेका छन् ।
