भन्सार कडाइपछि भद्रपुर बजारमा चहलपहल, भारतीय बजारमा गिरावट

भद्रपुर (झापा), २१ वैशाख – सीमावर्ती भन्सार नाकामा सरकारले कडाइ गरेसँगै झापाको पुरानो सहर भद्रपुर बजारमा पुनः चहलपहल बढ्न थालेको छ। लामो समयदेखि भारतीय बजारमा निर्भर रहेका उपभोक्ता र व्यापारीहरू स्वदेशी बजारतर्फ फर्किन थालेपछि स्थानीय व्यवसायीहरू उत्साहित भएका छन्।

स्थानीयका अनुसार भारतबाट नेपाल ल्याउँदा रु १०० भन्दा माथिका सामानमा भन्सार लाग्न थालेपछि नेपाली बजार चलायमान बन्न थालेको हो। यसअघि झापाको भद्रपुर आसपासका बासिन्दाका लागि भारतको विहारस्थित गलगलिया बजार प्रमुख किनमेल केन्द्र थियो, जहाँ सस्तो मूल्यमा दैनिक उपभोग्य सामग्री पाइने हुँदा नेपाली ग्राहकको आकर्षण त्यहीँ केन्द्रित हुने गरेको थियो।

व्यापार ३०–४० प्रतिशतले वृद्धि

भद्रपुर–६ स्थित ‘रवि वस्त्रालय’का सञ्चालक रवि गुप्ताका अनुसार पछिल्ला दिनमा व्यापार उल्लेखनीय रूपमा बढेको छ।
“केही समयअघि व्यापार अत्यन्त सुस्त थियो, तर अहिले फेरि आशा जागेको छ,” उनले भने।
उनका अनुसार हाल व्यापार ३० देखि ४० प्रतिशतले वृद्धि भएको छ र यो अवस्था कायम रहे शतप्रतिशत वृद्धि हुने सम्भावना छ।

त्यस्तै ‘राजेश स्टोर’का सञ्चालक शत्रुधन प्रसाद पनि बजारमा सकारात्मक संकेत देखिएको बताउँछन्। तर उनी भन्छन्, “यो अवस्था स्थायी हुन्छ कि हुँदैन भन्ने अझै स्पष्ट छैन। भन्सार कडाइ निरन्तर रह्यो भने व्यापार अझ बढ्न सक्छ।”

ऐतिहासिक बजारमा फेरि सम्भावना

पुराना पत्रकार देवेन्द्रकिशोर ढुङ्गानाका अनुसार भद्रपुर पहिले झापाको प्रमुख व्यापारिक केन्द्र थियो।
“२०३४ सालसम्म भद्रपुरमै मुख्य भन्सार कार्यालय थियो, तर काँकडभिट्टामा सारिएपछि बजार सुस्त हुँदै गयो,” उनले बताए।
उनका अनुसार हालको कडाइले तत्काल पुरानो जस्तो रौनक फर्काउन नसके पनि सकारात्मक प्रभाव देखिन थालेको छ।

भारतीय बजारमा ६०–७०% गिरावट

भन्सार कडाइको प्रभाव सीमापारि भारतको गलगलिया बजारमा स्पष्ट देखिएको छ।
त्यहाँका व्यापारी प्रदीप घोषका अनुसार नेपाली ग्राहक घटेपछि व्यापार ६०–७० प्रतिशतले घटेको छ।
“हाम्रो मुख्य ग्राहक नेपाली नै थिए, उनीहरू आउन छाडेपछि व्यापारमा ठूलो असर परेको छ,” उनले भने।

तर केही व्यापारी भने व्यापार पुनः सामान्य हुँदै गएको बताउँछन्। ‘सेवारो कपडा पसल’का नारायण लिम्बूका अनुसार सानो परिमाणमा सामान ल्याउन छुट दिइएकाले ग्राहक फेरि आउन थालेका छन्।

आवागमन घट्दा राजस्वमा असर

भद्रपुर भन्सार कार्यालयका सूचना अधिकारी प्रेमबहादुर लामाका अनुसार सीमामा आवागमन घट्दा राजस्व सङ्कलनमा कमी आएको छ।
त्यस्तै, सशस्त्र प्रहरी नायब उपरीक्षक शङ्कर शाहका अनुसार सीमामा निगरानी कडा बनाइएको छ र सामान स्क्रिनिङपछि मात्र भित्रिन दिइन्छ।

भद्रपुर भन्सार कार्यालयका अनुसार चालु आर्थिक वर्ष २०८२/८३ को वैशाख १९ गतेसम्म रु १३ करोड ४३ लाख ७९ हजार राजस्व सङ्कलन भएको छ।

दीर्घकालीन प्रभाव अनिश्चित

समग्रमा भन्सार कडाइले सीमावर्ती व्यापारको स्वरूप परिवर्तन गरेको देखिन्छ।
एकातर्फ नेपाली बजार सक्रिय बनेको छ भने अर्कोतर्फ भारतीय बजार प्रभावित भएको छ।

यदि सरकारले यो नीति निरन्तर र प्रभावकारी रूपमा कार्यान्वयन गर्न सकेमा भद्रपुरजस्ता पुराना बजारहरू पुनर्जीवित हुने सम्भावना देखिएको छ ।