टी–२० विश्वकपः न्युजिल्याण्डलाई हराएसँगै इंग्ल्यान्डको सेमिफाइनल यात्रा सुरक्षित
काठमाडौं । आईसीसी पुरुष टी–२० विश्वकप अन्तर्गत सुपर–८ चरणको प्रतिस्पर्धा झन् रोचक बन्दै गएको छ ।
शुक्रबार राति कोलम्बोस्थित आर. प्रेमादासा अन्तर्राष्ट्रिय क्रिकेट रंगशालामा भएको खेलमा इंग्ल्यान्डले न्युजिल्याण्डलाई ४ विकेटले पराजित गर्दै सेमिफाइनलमा स्थान सुरक्षित गरेको हो । तीन खेलबाट सतप्रतिशत जित निकाल्दै इंग्ल्यान्डले ६ अंक जोडेको छ ।
न्युजिल्यान्डले दिएको १६० रनको लक्ष्य पछ्याउने क्रममा इंग्ल्यान्ड सुरुआतमा दबाबमा देखिएको थियो । तर मध्यक्रममा विल ज्याक्स र रेहान अहमदले परिस्थिति सम्हाल्दै उत्कृष्ट साझेदारी गरेपछि खेल इंग्ल्यान्डतर्फ मोडियो । ज्याक्सले १८ बलमा ३२ रनको महत्वपूर्ण योगदान गर्दा अहमदले मात्र ७ बलमा १९ रन जोड्दै खेललाई अन्तिम क्षणसम्म नियन्त्रणमा राखे । इंग्ल्यान्डले १९.३ ओभरमा ६ विकेट गुमाएर लक्ष्य पूरा गर्यो ।
इंग्ल्यान्डको जितसँगै समूहको समीकरण फेरिएको छ। याे समुहबाट पाकिस्तानको पनि सेमिफाइनल सम्भावना कायमै छ। पाकिस्तानले आयोजक श्रीलंकासँग खेल्न बाँकी छ। उक्त खेलमा फराकिलो अन्तरले जित निकाले मात्र पाकिस्तानको आशा कायम रहनेछ ।
यता न्युजिल्यान्डको पनि सम्भावना समाप्त भएको छैन, तर उसले अन्य नतिजामा निर्भर रहनुपर्ने अवस्था सिर्जना भएको छ। अब सुपर–८ को अन्तिम खेलले सेमिफाइनल पुग्ने टोलीको टुंगो लगाउने छ ।
